Nýtt heimili :)

Það hefur sko ýmislegt skemmtilegt drifið á daga okkar fjölskyldunnar síðan ég skrifaði síðast almennilegan póst hérna (enda ansi langt um liðið). 

 

 Hæst ber að nefna að við keyptum okkur hús ! Lítið gult raðhús með garði, tveimur baðherbergjum og fataherbergi. Okkur fannst það þó ekki alveg nógu fínt að innan, svo við ákváðum að gera ýmsar „minni“ breytingar áður en við flytjum inn. Ég lofa að segja þér meira frá því seinna, og sýna þér myndir. Myndirnar í þessum pósti tók ég af húsinu þegar við mæðginin fórum aðeins að "máta" garðinn í húsinu um helgina :)

Með hjálp frá dásamlegum og hörkuduglegum vinum okkar fjölskyldunnar er allt að verða tilbúið og það styttist óðum í að við getum flutt inn. Hrikalega spennandi!

Að öðru, ég prófaði að gera svona „eggjapítsu“ í gær, svipuð þeim sem ég er búin að sjá um allt á netinu. Ég notaði ÞESSA uppskrift – með smá breytingum. Ég gerði mína þó aðeins of þunna, svo sneiðarnar „héldu sér“ ekki alveg nógu vel. Næst nota ég minna form, tek mynd af útkomunni og segi þér hvaða breytingar ég gerði á uppskriftinni. Hún var alveg hrikalega góð, og ég mæli alveg hiklaust með því að þú prófir. Namm!

Kveðja, Hanna Björg

Einföld og snyrtileg leið til að fylla á sprautupoka

 
Fyrir nokkru síðan lærði bestu leið í heimi til að fylla sprautupoka með kökukremi. Áður hefði ég alltaf reynt að halda pokanum opnum, og skófla kreminu ofan í. Mjög beisik, skyldi maður halda. En... það fór alltaf allt út um allt og þegar ég var búin að skreyta kökuna var gjörsamlega allur eldhúsbekkurinn, tvö viskastykki og ég sjálf útötuð í kremi!

Ég skil eiginlega ekki að ég hafi ekki fattað þetta sjálf ("takk, Martha Stewart"), en besta og einfaldasta leiðin til að fylla á sprautupoka er eftirfarandi.

1. Þú sækir nestispoka og glas.
2. Settu nestispokann ofan í glasið, og brjóttu efsta hlutann af honum yfir brún glassins (sjá mynd).
3. Settu kremið pokann.
4. Lokaðu pokanum (ég nota yfirleitt pokaklemmu, en það er líka alveg hægt að snúa bara upp á endann eða hnýta hnút).

Síðan klippirðu gat á annað hornið á botni pokans og setur pokann ofan í sprautupoka.

Þetta er ekki bara hundrað sinnum snyrtilegra. Ef þú gerir þetta, geturðu tekið nestispokann upp úr sprautupokanum hvenær sem er til að skipta um stút. Þetta er líka ótrúlega sniðugt ef þú ert að nota marga liti. Þá geturðu notað einn og sama sprautupokann fyrir alla litina.


Kveðja, Hanna

Gleðitár

 Ég bakaði 250 gleðitár um daginn :) Gleðitár eru pínkulitlar súkkulaðimúffur með súkkulaðikremi.

Einhver gæti spurt: "Afhverju bakaðir þú fullt af pínkulitlum kökum í staðinn fyrir að baka bara eina stóra?"

Jú, það var vegna þess að ég var svo glöð og þakklát að mér fannst ég þurfa að deila því með svo mörgum.

Ég gaf kennurunum í leikskóla Litla Ljúfs nokkur tár. Þau eru frábær, öll með tölu. Það hefði aldrei hvarflað að mér að ég gæti treyst einhverjum svona fyrir gerseminni minni. Þau standa sig ótrúlega vel og eiga heldur betur skilið klapp á bakið (eða súkkulaði).

Samnemendur mínir og kennarar fengu líka tár. Það væri ekki svona gaman að læra án þeirra. Mér finnst frábært að vera í svona góðum hópi nemenda og kennara. Áhuginn, samviskusemin og metnaðurinn er svo hvetjandi að það hálfa væri nóg.

Í vinnuna fóru svo fullt af tárum. Það er sko ekki sjálfgefið að vera tekið jafn opnum örmum inn á vinnustað :) Hvað þá þegar maður kann ekki neitt og þarf aðstoð á tíu mínútna fresti. Vinnufélagar mínir áttu svo sannarlega skilin nokkur gleðitár fyrir þolinmæðina.

Kveðja, Hanna

Nóg að gera...

Ég verð að viðurkenna að ég er hálf snortin vegna "bloggleysis-kvartananna" sem mér hafa borist :) Mikið er gaman að vita að svona margir séu að fylgjast með okkur hérna í útlandinu.

Ástæða blogg-leysisins er einfaldlega sú að ég hef varla haft tíma til að setjast niður síðustu vikur. Ég byrjaði nefnilega að vinna, síðan byrjaði ég í mastersnámi og svo byrjaði ég í annarri vinnu að auki.

Það er sem sagt alveg nóg að gera :) Ég hef svo reynt að nýta allan tíma utan vinnu og skóla með litla fallega drengnum mínum og fjallmyndarlegum föður hans. Stundum reyni ég að "múltí-taska" eins og sést á myndinni hér fyrir neðan :) Tek t.d. lærdómin með mér á róló. Það gengur misvel :)

Nú er álagið aðeins að minnka, svo hægt og rólega verður aftur almennileg regla á heimilinu. Ég get líka vonandi skrifað þér oftar :)

Kveðja, Hanna

Þegar Nína barði Geira

Litli ljúfur hefur ótrúlega gaman af því að hlusta á tónlist, og ef hún er flutt af börnum finnst honum tónlistin enn skemmtilegri. Við flökkuðum aðeins um YouTube í dag og ég sýndi honum m.a. nokkur myndbönd með Rokklingunum. Ég veit ekki alveg hvort okkar skemmti sér betur, mamman í nostalgíunni eða elsku drengurinn (jú reyndar veit ég það... það var alveg án vafa ég).

Það þarf að fylgja ein krúttmynd. Þó hún tengjist póstinum ekki :)

Ég held að flestir kannist við að hafa einhvern tímann misskilið söngtexta. Það hefur komið fyrir oftar en ég kæri mig um að muna hjá mér. Þegar við hlustuðum (og horfðum á) Nínu og Geira í flutningi Rokklinganna datt mér í hug misskilningurinn á þeim texta, sem ég áttaði mig ekki á fyrr en í kringum tvítugt.

"En Nína grét og gekk mér frá.
Hún gat ei skilið sem ég sagði þá."

Ég hélt, frá því að ég var bara 5 ára og fékk að hringja í útvarpið og biðja um óskalag, að Nína hefði lúbarið Geira - alveg gengið frá honum. Mér var létt 15 árum seinna þegar ég áttaði mig á því að hún labbaði bara í burtu frá honum.

Kveðja, Hanna

Muffinsbrauð

Ég gerði rosa gott bananabrauð um daginn sem ég bakaði í muffinsformum. Ég man ekki alveg uppskriftina því ég smakkaði mig bara til og gleymdi að skrifa niður jafn óðum. Ég þarf endilega að reyna að gera brauðið aftur - og passa þá að hafa penna og blað við höndina.

Það besta við brauðið var að ég gerði það án sykurs. Notaði hunang í staðinn :) Það var alveg hrikalega gott. Betra ef eitthvað er.

Litli ljúfur hélt auðvitað að þetta væri kaka og borðaði brauðið með bestu lyst og bros á vör. Það væri kannski ráð að gera enn hollara brauð og setja það í muffinsform til að gera það girnilegra í augum lítilla kökugrísa?

Kveðja, Hanna

Nú legg ég augun aftur

Mér finnst svo dýrmætt að geta átt notalega stund með fallega litla drengnum mínum áður en hann fer að sofa á kvöldin. Hann er svo áhugasamur þegar ég les fyrir hann. Vill skoða allar myndirnar og prófa að segja öll skemmtilegu orðin sem hann heyrir. Það er líka alveg ómetanlegt að fá að strjúka fallegu litlu tásurnar hans og syngja fyrir hann þar til hann leggur aftur augun og svífur inn í Draumalandið.

Í næstum hvert skipti sem ég syng vögguvísur fyrir ljúfinn minn syng ég fyrir hann Nú legg ég augun aftur. Það finnst eflaust einhverjum undarlegt að ég syngi jarðarfararsálm fyrir drenginn minn á hverju kvöldi, en fyrir því eru tvær ástæður.

Annars vegar þykir mér sálmurinn ótrúlega fallegur - lagið og textinn. Hins vegar, vona ég að þegar að því kemur að litli ljúfurinn minn þurfi að fara í jarðarför, þá muni hann tengja friðsæld og ró við sálminn en ekki sorg og sársauka.

Kveðja, Hanna